الجزء التالت والأخير للرحلة الكارتية للأفريقيا :
مشيت رجعت للمحطة سولت على الترانسبور لي كايدي لروصو لقيت واحد قال ليا نديك تال الفيلاج لي قريب أو من بعد كمل بالكار . مشيت ركبت معاه مشينا لداك الفيلاج لقيت الكار يالله خارج ركبت معاه او كانت الطريق طويلة او الكار غادي ها بشوية
حيت الطريق محفرة أنا داني النعاس بالليل فاش فقت لقيت الساعة وصلت للسبعة دالصباح مشيت سولت الشيفور واش روصو باقا بعيدة قال ليا راه فتناها ههههههه هادي كارتة ماحدها تقاقي أو هي تزيد فالبيض
هبطت أو تميت راجع فالطريق كنا فتناها بـ 25 كيلومتر قلت ماشي مشكل المهم قربت بقيت نشير وقف ليا واحد مول الطوموبيل قال ليا فين غادي قلت ليه روصو قال ليا غادي ندوز من واحد الفيلاج نخلي فيه شي سلعة من بعد نديك لروصو
هيا هاديك مشا قدا الغراض ديالو من بعد وصلني ركبو معانا شي بنات او واحد الراجل تا هما غادين تما
فالطريق دزنا على واحد الحاجز كان عامر بالبوليس قريب لروصو جاو عندي نيشان قالو ليا الباسبور عطيتهوم باسبور وأنا مخلوع إيحساب ليا درت شيحاجا وأنا مافخباريش
فاش شاف الباسبور ما عطاهش ليا عطاه للشيفور أو قال ليه دوزو لمركز الشرطة ( هيا عادية خدمتهم هاديك ) ولكن أنا تخلعت بقيت نترعد تا وصلنا للكوميسارية ديالهوم عيط الشيفور على البوليسي لي فالباب عطاه الباسبور
عيط ليا البوليسي مشيت معاه للداخل دخانا للبيرو جبد الكاشي كاشا الباسبور أو عطاه ليا أو قال لي bon Route ههههه عاد مشات الخلعة شديت الباسبور مشيت دخلت للحدود ما مشيتش للبيرو د تسجيل الخروج حيت البوليسي كاشا ليا الباسبور
ركبت الباطو لي كيقطع الواد قطعت للحدود الموريتانية وصلت مشيت باش نخرج من الباب وقفني واحد من الجمارك قاال ليا الباسبور فاش عطيتو الباسبور قال ليا نتا الفيزا لي عندك راه مابقات صالحة حيت خرجتي من موريتانيا خاصك تعاود وحدا خرا بـ 80 أورو
أنا كنت عارف غادي يوقع ليا هكاك أو حيت ماعندي بغيت ها نخرج من تما تا ايلا وقفوني فالطريق ماغاديش ايردوني للحدود
ولكن ولد الحرام شد الباسبور أو مابغاش إيطلقو مشا معايا للبيرو فين إيخلصو أو قال ليا تسنا تا إيعيط ليك البوليسي
أنا ماعندي ريال أو الباسبور شادينو مشكلة هادي بقيت ندور تما على برا واحد شويا خرج البوليسي تايسول على حسن فاش شفتو مشيت عندو قال ليا زيد قاد القيزا قلت ليه راني تسرقت او ماعندي 80 أورو
قال ليا شغلك هداك الا ماعندك الفيزا ماغادي تخرج من الباب بقيت نفكر أش ندير أش ندير رجعت بغيت نشد الباسبور باش نرجع للسينيغال ما بغا إيعطيه ليا ولد الحرام
أنا كنت باغي نشد الباسبور أو غادي نلقا شي طريقة نخرج بيها من الباب فاش نخرج غادي نخبي الباسبور أو غادي نقول ليهوم فالطريق طاح ليا الباسبور بينمشي للسفارة فنواكشوط أو نعاود واحد أخر جديد
ولكن هما ما بغاوش ايعطوني الباسبور
بت الليلة الاولى تما فالحدود فالنهار التالي دخلو الكاميوات دالمغاربة مشيت عند واحد عاودت ليه المشكل قال ليا أودي حنا المغاربة راه مانفوتو خوتنا غادي نخبيك فالكاميو تا نخرجو من هنا ياك هاز معاك الباسبور قلت لا راه شادين ليا الباسبور
قال ليا ماكانش عليك تعطيهوم الباسبور مشا يطلب واحد تما باش ايعطيني الباسبور قال ليه راه غادي ايرجع معايا للسينيغال مابغاش
قال ليا سمح ليا ماعندي ماندير ليك تا ايلا وصلتك تال الحدود دالمغرب ماغاديش ايخلوك تدخل اوغادي تكرفص تما فقندهار .
هي هاديك مشا هو او قبل مايمشي عطاني شي فلوس باش ناكل شي حاجة او كنت انا فقمة التعاسة حيت لقيت راسي فشلت او ندمت فاش خرجت من الدار
مشيت لواحد البلاصة ريحت فيها جاو واحد 3 مغاربة ريحو حدايا او بداو ايضحكو بيناتهم واحد شويا واحد فيهوم قال لي مغربي قلت ليه اه قال ليا اش جاي دير فهاد القفار يا ودي بوحدك
عودت ليه شنو وقع ليا او بداو ها يتعجبو قال ليا شفتي أفريقيا باش خايبة نهار تحصل فيها ماعندك ما دير
قال ليا واخا ماشي مشكل فاش تلاقينا كون هاني غادي نعاونوك مشا معايا عند واحد تايعرفو تما قال ليه جيب ليا الباسبور تاع الدري مشا جابو فالبلاصة ولد الحرام تايمشو ها باللعاقة .
قال ليا راه دبا غادي تخصك 80 أورو من غير المصاريف د الترانسبور من هنا تا المغرب قال ليا تا ايلا جمعنا ليك الفلوس غادي تبقا اومبان فموريتانيا
قلت ليه نديرو واحد الحل الا كان شي خوك فالمغرب نعيط لمالين الدار ايصيفتو ليا الفلوس او نتا عطيهوم ليا هنا قال ليا واخا او هز التيليفون عيط لنسيبو قال ليه راه غادي ايهضر معاك شي حد عطيه السمية ديالك باش ايصيفط ليك شي فلوس
من بعد عطاني التيليفون عيطت لمالين الدار عطيتهوم النمرة ديال داك الراجل قلت ليهوم صيفطو ليه الفلوس دبا فـ وافا كاش من بعد ساعة عيط نسيب داك الراجل قال ليه راه وصلوني الفلوس
قال ليا داك الراجل راه صيفتو ليه 3000 درهم أو عطاني هو 300 أورو أو قال ليا داكشي لي زايد من عندنا حنا نتعاونو معاك كان قرب الوقت فاش تايسدو الحدود قال ليا بلا ما تخرج دبا راه ما غادي تلقا لي يوصلك تال العاصمة
بقا هنا معانا تال الصباح او خرج هيا هاديك بقيت معاهوم باالليل درنا العشاء تما دخلو واحد 3 دالكاميوات مغاربة بلاصاو فالصف لي شادين فيه النوبة جاو عندنا تا هما طيبو العشا او بقينا مجمعين او عاود ليهوم داك خونا لي عاوني المشكل ديالي
فاللخر واحد كان من نفس المدينة او قال ليا كون هاني غادي تمشي معايا تال داركوم فرحت حيت ربي ماخيبني كنت غادي خارج ساعة الأقدار لاقاوني بهاد الراجل الله ايجازيه بالخير
فالصباح توادعنا مع دوك الناس لي عاونوني حيت هما غادين تال غامبيا بجوج طوموبيلات كبار عامرين بالسلعة
مشيت دخلت للبيرو عطيتهوم 80 أورو خرجت الفيزا أو خرجنا أنا وداك الراجل بالكاميو لبرا تسنا دوك جوج الاخرين تا خرجو او شدينا الطريق وصلنا نواكشوط وقفو تقداو شي حاجة او كملنا الطريق جيهت الحدود دالمغرب
وقفتا فواحد البلاصة بالتلاتة دخلنا الفريكو ديال واحد الكاميو خاوي طيبنا فيه الطاجين او أتاي تا كلينا عاد شدينا تاني الطريق وصلنا الدخلة دالحدود الموريتانية مع 12 د الليل بلاصاو او تجمعنا تاني على العشا تا تعشينا او نعسنا فالصباح دخلنا سجلنا الخروج او من بعد قطعنا الصحراء ديال قندهار دخلنا الحدود دالمغرب
داز داكشي بيخير او ماتهنيت تا كاشاو ليا الباسبور خرجنا أو كملنا الطريق تال أولاد تايمة وصلنا مع 2 د الليل كنت فقمة الفرح حيت قدرت نرجع للدار بسلام
مشيت عند الشيفور وانا نبوس ليه راسو او جبدت 20 أورو كانت فجيبي نعطيها ليه ما بغاش قال ليا الله مانشد من عندك شي حاجة نتا قد ولدي او هادشي لي درت ليك على راسي او عينيا نتمنى ليك التوفيق او قال ليا شوف مرة خرا ماعمرك تفكر ترجع لأفريقيا
راه عطا الله البلدان كاينا أسيا كاينة أوروبا تما تا الا بقيتي فيه اومبان مايبقا فيك الحال ضروري تلقا الحل اما أفريقيا راه السفارة براسها ماتعقل عليك
عاودت بست ليه راسو او جيت للدار دخلت عليهوم لقيتهوم كاملين ايتسناوني فرحو بيا
الحمد لله فواحد المرحلة فالحدود بكيت الدموع حيت لقيت راسي مادرت والو خططت ساعة كولشي فشل
دبا راني قاديت المشكل دالبنك انا سديت الحساب أو عاودت واحد أخر جديد راني داير خطة إن شاء الله على حساب نسافر لهونغ كونغ العام الجاي او غادي ندير الإحتياط ديالي هاد المرة .
كنشكر أي واحد قرا هاد القصة او ستافد منها جميع التفاصيل حقيقية او راني صيفت معاهوم صور من جواز السفر للتأكيد أو بالنسبة للناس لي غادي إيسافرو للأفريقيا هادي بعض النصائح :
ما عمرك تعول على الكارط دالبنك حاول تصرف 5000 أولا 6000 درهم للأورو أوخبيها فشي بلاصة مابايناش باش تا إيلا وقع ليك لا قدر الله بحال المشكل ديالي قطع البيي د الطيارة او رجع لبلادك
حاجة أخرى بالنسبة للسفارة ماتسنى ايعاونوك هما أصلا مامعتارفينش بالمغاربة فأفريقيا
تانيا ما دير تيقة فتا واحد راه الأفارقة همهم الوحيد هما الفلوس
شكرا لكم
