أنا رجعت ليكوم مع الجزء التاني من الرحلة ديالي فأفريقيا .
مهم فالجزء الأول عاودت ليكوم على العراقيل لي تعرضت ليها قبل ما نوصل للسينيغال أو أخر حاجة كانت فاش حبسوني على حساب ورقة التلقيح الدولي .
ولكن من بعد ما فكيت المشكل خلاوني ندوز مهم خرجت من البوابة أو كانت الطريق باقي بعيدة للعاصمة دكار مهم من البوابة خاصك تركب مع شي مول الموتور حيت تما دايرين الماتر بحال الطاكسيات أولا كروسة
ركبت مع مول الموتور داز من واحد الكاريان باين عليهوم الفقر المقفع ناس ساكنين ها تحت شي ميكة أو شي وحدين مفرشين ها فالأرض بلا غطا
دازت 15 دقيقة وصلنا للمحطة الكبيرة فروصو .... هي كبيرة بزاف ولكن بدائية حيت فيها الطاكسيات هما الخطافة لي عندنا حنا شي طوموبيلات كاع مفرشخين سولت تما على الترانسبور ديال دكار أو لقيت واحد الطوموبيل بيتخرج نيت ركبت معاه أو كان التمن تقريبا شي 3500 فرنك سينيغالي تصورو الطوموبيل هي رونو 12 طويلة أو راكبين فيها 11 واحد أو خانزة الريحة فيها مع كاين الصهد زيد عليها شنيولة لي امرة بيها ديك المدينة خرجنا للطريق الكبيرة أو وقفونا فحاجز ديال العسكر طلو على الطوموبيل بنت ليهوم أنا لي بيض تما طلبو مني الباسبور عطيتهوم شافوه أو هما ايخلونا ندوزو .
خرجنا للطريق الكبيرة أو وقفونا فحاجز ديال العسكر طلو على الطوموبيل بنت ليهوم أنا لي بيض تما طلبو مني الباسبور عطيتهوم شافوه أو هما ايخلونا ندوزو
فالطريق قلت بلي صافي فت الجزء الصعب او الرحلة لي كنت نتخيلها هي هادي الغابات لي كنا ندوزو عليهوم أو الناس لي تنتلاقاوهوم فالطريق أو الجو الإستوائي كاتحس براسك فعالم أخر أو منقدر نوصف ليكوم الشعور ديالي
أوقفنا فواحد البلاصة أو قال لينا الشيفور رتاحو شويا أو حركو رجليكوم واحد 30 دقيقة داكشي نيت لي كنت بغيت حيت كنت ها مقرد فاللور
خرجنا أو دارو بينا العيلات شي هاز المانجا أو شي وحدين هازين شي فاكهة أول مرة نشوفها دراري الصغار مادين إيديهوم إيطلبو
مشيت أنا ندور فديك البلاصة شويا مشيت نشري قرعة دلما لقيتهوم ماتيبيعو القراعي حيت هما الماء عندهوم دايرينو فالساشي بحال الحليب أو رخيص بزاف ساشي فيه 1 لتر بـ نصف درهم أي 0.50 ولكن الماء عادي أو ماشي صحي
من الأحسن الواحد إيتسنا تال العاصمة تما كاين سلعة مزيانا
شريت كارطا ديال التيليفون SIM بـــ 1000 فرنك أو رجعت للطوموبيل بدينا نقربو شويا بشويا . فاش أوصلنا تما بالليل كانت المحطة خارجة على العاصمة بشي 10 كيلومتر أو كانت كبيرة بزاف أو عامرة بحال المحطة د اولاد زيان
شديت طاكسي قال ليا فين غادي
أنا مكنتش محدد فالوجهة من قبل أو قلت ليه إيديني للسفارة المغربية حيت كانو الأوضاع شويا متوترة بسبب مشاكل سياسية بين المعارضة او الحكومة السينيغالية داكشي علاش بغيت نكون قريب للسفارة .
وصلنا للبلاصة أو كان تما راقي حيت فيه ها السفارات أو القنصليات مشيت نقلب على شي فندق قريب تما لقيت واحد فندق قريب للسفارة أو نقي بــ 25000 فرنك سينيغالي تقريبا شي 400 درهم مغربي
خلصت فيه يومين أو طلعت دوشت او نعست حيت كنت عيان
فالصباح سمعت الدقان فالباب حليت لقيتهوم جايبين ليا الفطور تال البيت زعما عندهوم الخدمة مريـGــلة فطرت أو هزيت لباسبور أو الوتائق المهمين أو هبطت للتحت ضربت ضويرة باش نشوف الفندق كيداير
من بعد خرجت للمدينة كانت بالنهار تبان فشكل أخر
واخا داكشي لي كانسمعو على السينيغال هي مطورة بزاف العاصمة بانت ليا حسن من الدارالبيضاء فالبنية التحتية أو جميع الجنسيات كاينين تما بمجرد أنك تمشا فالشارع تاتعرف على أصدقاء
تعرفت على ناس من تونس دايرين مشاريع ديالهوم تما أو مغاربة أو صينيين مسييرين الميناء الدولي لي هو أقرب للميناء فطنجة المهم هي أشبه بملتقى التقافات
رجعت للفندق هزيت التابليت هبطت للصالون باش نتكونيكطا أو نخطط للرحلة الجاية لي غادي تكون من دكار لــ غامبيا حيت الويفي فالطابق الرابع كان قليل
كانت طاحت عليا واحد الفكرة أنني نشد الطيارة من دكار مباشرة للعاصمة ديال غامبيا أو تمنيت كون درت هكاك ماكنتش غادي نتكرفص
لقيت الطيارة كانت خارجة من بعد يومين بــ 216 دولار كانت رخيصة ولكن أنا قررت نغامر هنا كانت الكارتة
مهم خرجت من الفندق أو شديت طوبيس من داكار لمدينة KAOLACK تقريبا شي 5 ساعات ديال الطريق وصلت او كان قرب المغرب مشيت لواحد فندق رخيص ديال واحد العائلة كانو ساكنين فيه تا هما بت فيه الليلة
فالصباح خرجت باش نكمل لمدينة KARANG على الحدود مع غامبيا
فاش وصلنا مشيت لواحد القهوة ريحت فيا ناكل شي حاجة كليت من بعد مشيت لواحد البنك كاين حدا الباب دالحدود باش نتيري شي فلوس للإحتياط باش مانبقا أومبان
تيريت 50 أورو أو مشيت دخلت للحدود مع غامبيا كان تما عامر أو بنادم شي لاصق فشي كولشي بغا يسبق
الغوات او الصداع أو البوليس تايبقا يسب فبنادم دخلت للبيرو فاش كيسجلو الخروج عطيتهوم الباسبور سولوني نفس الأسئلة الروتينية فين غادي أش بيدير مهم جاوبتهم أو كاشاو ليا الخروج أو تميت خارج
وصلت عند الجمارك أو قبل ماندخل عندهوم قلت معا راسي علاس مانحسب الفلوس لي عندي باش ما يوقع ليا نفس المشكل لي وقع فروصو بغيت نجبد البزطام نشوف أش فيه وانا نتسمر فبلاصتي البزطام مالقيتو فالجيب
قلبت الصاك تا هو والو ناري أش هاد الموصيبة عاودت قلبت حوايجي كاملين والو صافي فشلت كاع ليكارط دالبنك أو البيي د الطيارة من غامبيا لـ ليبيريا كولشي مشا الباسبور بوحدو هو لي بقا ليا أو ديك 50 أورو لي تيريت او شي حاجة كانت فجيبي
رجعت لمكتب تسجيل الخروج باش نشوف ياك ما نسيتو تما قالو ليا لا او سولوني واش كان معايا فاش دخلت قلت ليهوم اه واخا مامتأكد
قالو ليا شنو لي فيه جاوبتهم او قالو ليا الا داه شي حد الداخل هنا اة مالقا فيه فلوس غادي الوحو فشي بلاصة ولكن أنا كنت خايف على ليكارط دالبنك هما الأفارقة معروف عليهوم النصب والقرصنة
دازت ساعة وأنا ندور تما والو مابانت تا حاجة
مشيت رجعت للبيرو طلبت منهوم نرجع ندخل حيت فايت طبعو ليا الباسبور فيه الخروج قالي ليا واحد فيهوم ماشي مشكل أصلا مازال ما دخلتي لغامبيا
رجعت للفندق هزيت التابليت دخلت للحساب ديالي فـ bmce حبست كاع ليكارط بحكم أنهم تسرقو أو دخلت للحساب ديالي فالبايبال حدفت منو ليكارط أو تاصلت بالرقم الأخضر ديال البنك بلغتهوم أو عاودت لعائلتي تا هي أش أوقع .
ماكنتش عارف أش ندير ديك الساعة فاش ندمت علاش مامشيت فالطيارة من قبل
أو أصلا الخظأ ديالي أنا حيت جمعت ليكارط كاملين فبلاصة وحدة
بالليل تاصلت بعائلتي طلبت منهوم إصيفتو ليا فالصباح 4000 درهم فـ western union باش نقطع فالطيارة للمغرب
فالصباح فاش مشاو للبنك باش إيصيفطو قالو ليهوم ممنوع علينا نصيفطو الفلوس من المغرب لبعض الدول الأفريقية ماصدقتش أو تاصلت بالبنك أو قالو ليا راه جميع مؤسسات تحويل الأموال ممنوع عليها تحول الفلوس لأفريقيا
من غير الطلبة لي مسجلين فالسفارة المغربية
ناري على كارتة كان خاصني نسول على هادشي قبل ماندير هاد المغامرة
قلت لمالين دار صافي خلو داكشي تا نمشي للعاصمة او ايحن الله ركبت للعاصمة فاش وصلت مشيت للسفارة دخلت فالإستقبال لقيت واحد البنت سينيغالية قلت ليها أش أوقع قالت ليا تسنا أو كانت السفارة خاوية واحد شويا دخلات واحد المرة مغربية
كانت باغا تشوف السفير جات جلسات حدايا قالت ليا مغربي قلت ليها اه أو قالت لي ياك لاباس شنو خاصك فالسفارة هنا عاودت ليها شنو وقع قالت ليا مشكلة هادي
او قالت ليا محال ايعاونوك هادو حيت ها الطلبة لي كيعطوهم الحق فتحويل الأموال
واحد شويا دخل السفير داز حدانا شويا رجع سول ديك المرا علاش جات قالت ليه على حساب شي وراق ديال شي شركة صيفتها عند واحد الموظف أو سولني أنا أش بيت عاودت ليه المشكل او قلت ليه باغي شي حل باش ايمكن لمالين الدار ايحولو ليا الفلوس
قال ليا مايمكن خاصنا شحال تاع الوتائق أو هادشي خاص بالطلبة قلت ليه ها شوف أي حل المهم ها مانبقا فهاد البلاد أو هو ايتبدل فالبلاصة او كايغوط واش بغيتي نعطيك فلوسي راه قلنا ليك لا هي لا
كنت واحد اللحظة باغي نسبو أو نخرج ولكن مابغيت نزيد مشكل على مشكل خرجت بلا ما نجاوبو
ريحت على برا او انا صافي فشلت تاصلت بمالين الدار قلت ليهوم أش كاين تا هما تصدمو او خافو عليا ولكن ماكاين تا حل ..
( المشكلة كان واحد الحل ولكن مع الخلعة أو الصدمة تا واحد ما فكر فيه لا أنا لا عائلتي هو إيقطعو ليا عائلتي البييى من المغرب او ايصيفتوه فالإميل ولكن كلنا نسينا هاد الحل )
تا من الفلوس مابقات عندي شي حاجة كتيرة فجيبي
قررت نبيع التابليت أة التيليفون مشيت للسوق نقلب على شي حد لقيت واحد أو قال ليا نعطيك فيهوم 53000 فرنك تقريبا شي 900 درهم مغربي
هادشي تايعني نخسر فيهوم 3000 درهم ولكن أنا ديك الساعة كنت باغي ها نرجع لبلادي مسحت داكشي لي فيهوم أو شديت فلوسي أو مشيت للمحطة ركبت للحدود مع موريتانيا بـ 5600 فرنك تعطل الكار بزاف شي 15 ساعة أو هو شاد الطريق
فاش وصلت بانت ليا ديك البلاصة ماشي هيا لي كنت فيها فالاول فاش سولت لقيت راسي فمنطقة أخرى بعيدة على روصو بـ 300 كيلومتر هو داز من تما أو انا كنت ناعس واقيلا
ولكن قال ليا واحد راه تا هنا كايقطعو منو لموريتانيا مشيت ركبت مع مول الموتور بـ 500 فرنك تا الواد لي كيقطعو منو لقيت واحد البيرو صغير فيه بوليسي قال ليا فين غادي قلت ليه موريتانيا بقا يشوف الباسبور أو باينا عليه أول مرة تايشوفو
عيط على صاحبو بدا يوريه الباسبور حيت ديك البلاصة ماكايدوزو منها لا طوموبيلات لا كاميوات فيها ها الفلايك تيقطعو بيهوم السينيغاليين
سولني قال ليا واش الباسبور ديال فين قلت ليه المغرب قال ليا عطيني البطاقة الوطنية هنا عرفتو أول مرة يشوف الباسبور المغربي حيت لاكارط ممنوع إيسولك عليها شي واحد فشي بلاد أخرى
أنا حيت لاكارط مشات مع البزطام قلت ليه ماجبتها معايا .. تما قال ليا سير لمدينة روصو تما فين غادي دوز .
ناري 300 كيلومتر أش جا يصبر ليها تاني ..
الخاتمة غادي نكتبها بوحدها باش ما نطول عليكوم حيت باقي بزاف دالكوارت
شكرا لجميع من قرأ القصة باش تستافدو منها لعل فيها بعض النصائح لمن قرر القيام بمتل هده المغامرة /span>
ليست هناك تعليقات:
إرسال تعليق