السلام عليكم
أنا سميتي حسن من مدينة أولاد تايمة
بغيت نشارك معاكوم التجربة ديالي فالهجرة نحو بلدان أفريقية بغرض السياحة
فالبداية خاصكوم تعرفو بلي أنا من المتتبعين ديال المدونة
عائلتي عارفا عليا بلي مغامر أو عزيز عليا ندير داكشي لي كولشي تايخاف منو مهم فالبداية ديال 2016 قررت أنني ندير رحلة العمر لي حياتي كاملة أو أنا تانحلم بها .
الجزء الأول من الرحلة كان عبر الرحلات البرية من المغرب في إتجاه موريتانيا تم السنغال تم غامبيا
او الجزء التاني كان رحلات جوية من غامبيا في إتجاه ليبيريا تم ليبيريا في إتجاه كينيا .
المهم بديت نقاد الوتائق ديالي أو مشيت قاديت تأمين السفر من عند bmce bank بحكم أنني منخارط معاهوم كذلك طلبت منهم بطاقة إئتمانية دولية أو فغضون أسبوع وجدو ليا كولشي .
تأمين السفر كان لسنة 2016 و 2017 لأنني كنت معول إحتفالات رأس السنة 2017 ندوزها فكينيا قبل منرجع للمغرب
عائلتي ما كانش عاجبهم الحال حيت غادي بوحدي أو بالخصوص ملي الوجهة ديالي هي أفريقيا نصحوني باش نتراجع ولكن حب المغامرة لي عندي هو لي خلاني نطمأنهم أو واعدتهم بلي غادي نتاصل بيهوم كل 5 ساعات .
سافرت للعاصمة الرباط باش ندير إستشارة مع القنصليات ديال البلدان لي غادي ليهوم طلب مني أسبوع باش نساليهوم
قرب الشهر 6 أو هو موعد الإنطلاقة عاودت تأكدت من جميع الوتائق أو جهزت حقيبة ظهر فقط فيها 3 لبسات صافي لاأني مابغيت نتقل عليا وأنا غادي ها جوال بوحدي .
سكانيت جميع الوتائق أو البطاقات الإئتمانية أو جواز السفر او سجلت نسخة فكلي USB او نسخة محفوظة فالإيميل ديالي للإحتياط .
وصل الوقت أو توادعت مع العائلة ديالي بالدموع أو الله شاهد عليا خديت تاكسي من أولاد تايمة لمدينة أكادير بالظبط محطة الحافلات أو قطعت تدكرة لمدينة العيون كانت الحافلة غادي تخرج من بعد ساعتين تسنيت فالمحطة ملي وصل الوقت ركيت الحافلة كنت عيان شويا أو نعست .
وصلنا لمدينة العيون مع 6 د الصباح مشيت لفندق باش نرتاح شويا من السفر كان الفندق رخيص 60 درهم لليلة مهم بت ليلة من بعد قطعت فالكار لمدينة الداخلة وصلنا تاني مع الصباح عاودت تاني مشيت لفندق عندو إطلالة على البحر كان التمن ديالو غالي شويا مقارنة مع الأول 200 درهم .
بت ليلة وحدة أو مشيت نقلب على الترانسبور لي غادي للحدود المغربية مع موريتانيا
قلبت تا عييت مالقيت والو أو الكار ديال ستيام كان خاصني نتسنا 3 أيام عاد إخرج ولكن أنا ما فيا لي إيتسنا خصوصا أن الداخلة معروفة بالبرد القارس أو الرياح لكونها شبه جزيرة .
مشيت بغيت نشد طاكسي كورسا طلب مني مولاها فالاول 400 درهم بديت نتاوا معاه تا قبل بـ 250 درهم مشينا خرجنا مع الظهر أنا أو هو بوحدنا كانت الطريق خاوية أو قليل فين نتلاقاو مع شي شاحنة عسكرية أو فبعض المناطق كانت الطريق مسدودة بالرمال
صراحة كان المنظر خيالي مشاهدة الرمال الدهبية وهي تزحف على طول الطريق .
وصلنا للحدود مع 6 أو قال ليا مول الطاكسي بلي الحدود سادين خاصني نتسنا تال الصباح كنت مرتاح حيت أصلا كنت باغي نشوف المنطقة الحدودية كيفاش دايرا أو طلبت منو بعض النصائح لي خاصني نطبقها فاش نخرج بحكم أنه عارف مزيان المنطقة فاش سولني على الوجهة ديالي أو عاودت ليه مخطط الرحلة ماصدقش أو قال ليا بلي حياتو كاملة ماعمر سمع سي واحد بغا إيقوم برحلة بحال هادي .
عطاني بعض النصائح أو من ضمن النصائح كانت هي أنني مانتيق فتا واحد لأنه الأفارقة معروفين بحبهم للمال أو ندير الإحتياط ديالي من بعد توادعت معاه او رجع هو للداخلة أو قبل مايرجع مشا معايا عند واحد مول القهوة تما أو طلب منو مايفرط فيا قال ليه راه صديق ديالي . بقيت مريح فالقهوة شويا أو خرجت ندور بانو ليا الحدود شويا خاويين بعض الشاحنات فقط هي لي واقفا تسنا بالليل عيط عليا مول القهوة أو وراني واحد البيت قال ليا نعس هنا تال الصباح أو جاب ليا 2 مانطات أو قال ليا خود راحتك بلا ماتفيق بكري راه نتا غادي ها على رجليك . فعلا داكشي لي درت خرجت تا هضرت معا مالين الدار أو العائلة ديالي أو رجعت للبيت واحد شويا جا مول القهوة جاب واحد براد أتاي أو جلس فالبيت أو بدا يسول على الوجهة ديالي فاش عاودت ليه تا هو ستغرب ولكن بحكم أنه كبير فالسن أو دوز 20 سنة فالحدود عاود ليا على قصص عاشها تما فبعض الأحيان صعيب تصدقها كانت الجلسة معاه ممتعة .
فالصباح فقت معا 10 مشيت غسلت حالتي أو خرجت نطل أو أنا نلقا واحد الصف ديال الشاحنات طويل أو شحال تاع الصداع
تصدمت هادشي كامل ماخليتو البارح مشيت هزيت حوايجي أو مشيت نتوادع مع مول القهوة أو طلب مني نصرف الفلوس للأورو قبل مانخرج على حساب الفيزا الموريتانية ( هادي كنت أنا نسيتها ) او طلب مني نزورو الى رجعت ولكن أنا فالمخطط ديالي غادي نرجع من كينيا فرحلة جوية ولكن واعدتو أنني غادي نرجع إنشاء الله .
مشيت صرفت الفلوس أو كان مايمكنش إيصرفو ليك كتر من 3000 درهم أو كيطلبو ليك الباسبور قبل ما يصرف من بعد مشيت للبوابة وقني الشرطي طلب مني جواز السفر أو كان مبتسم ( صراحة البعض فالحدود ما غادي ننسى طريقة التعامل ديالو ) سولني على الوجهة ديالي أو جاوبتو بالوجهة الأخيرة لي هي كينيا أو ستغرب كيفاش ندير أو عاودت ليه المخطط أو من بعد تمنى ليا التوفيق أو طلب مني هو الأخر الإحتياط أو وجهني لمكتب الشرطة باش إطالعو على السجل العدلي ياك ما مبحوت عليا فشي مدينة
من بعد لمكتب تسجيل الخروج من بعد لمكتب الجمارك أو هنا غادي إيصعبو القضية أول سؤال هو فين غادي جاوبتهوم أو قالو ليا نتا كاتكدب مايمكنش تمشي هاد المسافة كاملة بوحدك أو هاد معاك كمية قليلة من الملابس أنا كنت عارف بلي هادا ها بروتوكول باش إلعبو ليا على الأعصاب ديالي أو كان الجواب ديالي هو كالتالي :
أنا مواطن مغربي أو ما خرجت هاد الباسبور باش نخبيه فالدار او الدول لي غادي ليها سبق ليا أو ستاشرتهم أو كولشي مريكل أو من الأخر أنا حر نمشي لأي بلاصة طالما ماعندي شي مدكرة بحت أو لا شي وتيقة ناقصة .
متا كانش عاجبهوم الحال على هاد الهضرة أو طلبو مني نخوي جيوبي من داكشي لي فيهوم أو قلبو الصاك ديالي لدرجة أن الجيوب لي فالسروال قلبوهوم كانو إيقلبو على أي حاجة ممكن إيشدوني بيها ولكن مالقاو والو هنا ضحكت واحد الضحكة أو لاحو ليا الصاك ديالي جمعتو أو شديت الباسبور ديالي أو مشيت جيهت بوابة الخروج تما كانو عناصر من الشرطة العسكرية أو الديستي أو الجيش عاودو تأكذوا من الوتائق ديالي من بعد حلو ليا الباب فاش خرجت كانت هادي بداية ديال رحلة العمر بين الحدود المغربية والموريتانية كاينا منطقة سميتها قندهار الصحراء أو ممتدة على طول 7 كيلومترات كانت أشبه بمنطقة حربية الطريق كانت وعرة أو السيارات المحروقة في كل مكان أو الأفارقة موجودين بكترة أو كاينين سيارات مازال جداد بدون لوحت ترقيم .
تما باش توصل تال الحدود الموريتانية خاصك تركب مع خطاف موريتاني بمبلغ 500 أوقية ( حوالي 13 درهم مغربي ) ماشي مبلغ غالي حيت الفلوس طايحين بزاف تما ولكن المرة الأولى ضروري تصيد مشيت وصلت الحدود دخلت لمكتب تسجيل الدخول لقيت 2 بلبسة العسكر كان المكتب قديم أو عامر بالتراب أو كانو حاطين حدا الباب 2 أسلحة من نوع الكلاشينكوف باينين ماعمرهوم تستعملوا حيت عامرين بالغبار . طلب مني جواز السفر أو سولني شحال بينبقا جاوبتهوم بلي غادي ها ندوز من العاصمة أو طلب مني 80 أورو على حساب الفيزا خلصتو أو طلب مني نجلس قدام الكاميرا باش إيصورني أو خرج الفيزا فالبلاصة لصقها فالباسبور ( غادي نشارك معاكوم الصورة دالفيزا للتأكيد ) أو صيفتني لمكتب الجمارك تما ماشي بحال المغرب قال ليا واش هاز معاك شي حاجا ممنوعة قلت ليه لا صافي طبع الباسبور أو قال ليا طريق السلامة .
خرجت شريت بطاقة سيم للهاتف بملغ 400 أوقية ( حوالي 10 دراهم مغربية ) من نوع موريتيل 3G أو مشيت عند واحد الخطاف سولتو شحال يوصلني تال العاصمة نواكشوط قال ليا 3500 أوقية ( حوالي 95 درهم مغربي ) المبلغ ماشي غالي مقارنة بالمسافة لي كتبلغ كتر من 500 كيلومتر ركبت معاه أو كنت أنا بوحدي كان مشارجي سلع مغربية فيها سكر أو دقيق أو الزيت
الطريق كانت طويلة أو خاوية ولكن الفرق بينها أو بين المغرب هو أنه كل 5 كيلومتر كاين حاجز للدرك الوطني أو كل حاجز خاص تعطيهوم الباسبور باش إيشوفوه وصلنا من بعد 7 ساعات ديال الطريق للعاصمة نواكشوط أو فالحي لي حطني فيه كانو فيه الأارقة من جميع الجنسيات أو محال واش إبان ليك شي حد موريتاني لقيت صعوبة فالتواصل معاهوم لكونهم يتكلمو بالحسانية أو قليل لي كايفهم الفرنسية ديالنا حنا
مهم مشيت نقلب على شي فندق لقيت واحد الفندق 3 نجوم بالإستعانة بموقع booking.com بمبلغ 10000 أوقية لليلة ( حوالي 270 درهم ) بت فيه 3 أيام كتاشفت خلالها العاصمة الموريتانية أو تعرفت على العديد من الاصدقاء فهاد المدة القصيرة .
من بعد ما دازت المدة مشيت قطعت تدكرة للحدود الموريتانية مع السنغال بمبلغ 5000 أوقية ( حوالي 136 درهم مغربي ) خرجنا مع الفجر او كانو نص ديال الركاب تقريبا سينيغاليين الشيفور كان موريتاني او كان ضحوكي عزيز عليه إيضحك الناس وصلنا من بعد 6 سوايع ديال الضحك او النشاط للمدينة روسو لي كانت عبارة عن مدينة كبيرة قاسمها الواد النص كان ديال موريتانيا أو النص ديال السنغال تما درت أول غلط فالدخلة عند الجمارك الموريتانية طلبو مني الباسبور عطيتو ليهوم أو سولوني على الوجهة قلت ليهوم داكار أو سولوني ياك ما هاز شي حاجة ممنوعة قلت ليهوم لا وطلب مني نصرح بكمية المال لي هاز معايا أنا فاش جاوبتهوم نسيت ماحسبت 50 أورو + 500 درهم كنت مخبيهوم للإحتياط فاش بداو إيفتشو لقاوهوم أو قالو ليا أنا تانكدب عليهوم هادشي خلاهوم إيقلبو الصاك بالكامل او الجيوب ديال السروال كاملين فالأخير قالو ليا بلي غادي إيصادرو الفلوس لي ماصرحت بيهوم أنا تصدمت أقلت ليهوم بلي هادي ماكاينا فالقانون أو قال ليا بلي القانون عندنا فبلادنا ماشي هو القانون ديالكوم أو صدقت خاسر ما يقارب 38500 أوقية مبلغ كبير بالنسبة ليهوم .
قلت ماشي مشكل ضروري يوقعوا ليا بعض المشاكل فأول مرة .
من بعد ما ساليت الإجراء ديال الجمارك خاصني نقطع الواد أو كاينين 2 باخرات خدامين حيت الواد كبير بزاف الباخرة كانت كاتهز شاحنات كبار أو طوموبيلات أو الناس تا هما كتستغرق 30 دقيقة باش تقطع الواد ( نصيحة : نتمنى أي واحد إيعتمد على راسو أو ما يطلب من شي سينيغالي أولا موريتاني إيتكلف ليه )
فاش كاتوصل للجمارك السنغالية كاتحط الباسبور عند مكتب التسجيل أو تسنا على برا تا يعيطو عليك أو حيت لقيت تما عامر طلب مني الوقت 3 ساعات باش نعاود نشد الباسبور
واحد الملاحظة : تما فالسينيغال مايسوق ليك تا واحد أش هاز الجمارك ماتايفتشوك ما والو
شديت الباسبور أو مشيت جيهت البوبة باش نخرج وقفني عنصر من الشرطة أو طلب منيي وتيقة التلقيح الدولي ( وتيقة التلقيح الدولي كيطلبوها جميع الدول الأفريقية بحكم أن الأجانب عرضة للإصابة بالأمراض )
أنا ماكنتش عارف هاد القضية واخا كان نصحني بيها موظف فالبنك طلبت منو إيتساهل معايا ولكن كان قاسح أو قال ليا بكل بساطة Retour à votre pays بقيت مزير معاه أو قلت ليه بلي عندي تأمين على السفر أو فيه كولشي واخا أنا ها تنكدب ولكن جبدت ليه نسخة من التأمين كنت طلبتها من البنك باللغة الإنجليزية أو عطيتها ليه هو بقا يشوف فيها مافهم والو أو عطاها لواحد صاحبو من بعد عيط ليا طلب مني 1000 فرنك سينيغالي ( حوالي 20 درهم مغربي ) أو خلاني ندوز
سمحلو ليا عييت من الكتبة غادي نكتب الجزء التاني الأسوأ لي وقع ليا فالسنغال من بعد .
ليست هناك تعليقات:
إرسال تعليق